যেনিবা (চনেট)

যেনিবা ব্ৰহ্মাণ্ডত মাথোঁ এটাই সূৰ্য। 

যি বা সূৰ্য সিও এটা অগ্নিপিণ্ড মাথোঁ।

যেনিবা তেওঁ আৰু মোৰ নহয় একো। 

যেনিবা চনেট বুলিলে কেৱল চৈধ্য।

যেনিবা দেহৰ উত্তাপ মাথোঁ উত্তাপ। 

উম এটা আভিধানিক শব্দহে মাথোঁ।  

নাঙঠা দেহাটো সাবটি তোমাৰ গাটো 

গৰম বোলাটোও আছিল অহেতুক। 

কেনে আছা বোলা কথাষাৰ সম্ভাষণ  

তাৰ বাদে যেনিবা আন একো নহয় । 

শাসকৰ হঠকাৰিতাৰ নিবাৰণ   

যেনিবা নাই। উইয়ে টোকাবহী খাই 

নিষ্পাদন কৰে শতযুগৰ সাধন।  

যেনিবা তুমি নাই। যেনিবা কথা নাই। 

আত্মজীৱনী

মই মলত্যাগ কৰিবলৈ বহোঁতেই

তোমালোকৰ গানৰ জোৱাৰ উঠিছিল

মই মলত্যাগ কৰি থাকোতেই

মানুহৰ হকে মাত মতা নেতাজনক

গ্ৰেপ্তাৰ কৰি লৈ যোৱা হৈছিল

মই মলত্যাগ কৰি থকাৰ সেই সময়খিনিতেই

দেশখনলৈ পৰিৱৰ্তন আহিছিল

প্ৰতিদিনেই প্ৰাত:কৰ্ম ফেৰা কৰি

মই যেতিয়া বাজলৈ ওলাওঁ

মুখামুখি হওঁ এখন নতুন পৃথিৱীৰ ।।