মুলুক ফকীৰৰ আলখাল্লা

মুলুক ফকীৰৰ আলখাল্লাত ৰমজানতে দাগ

ওভটাই দে আলখাল্লা ভাগ ফকীৰ ভাগ।

টানি আজুৰি আলখাল্লা সকলোৱে বোলে দে

আৰ পৰা আনি তাৰ পৰা আনি জোৰা কাপোৰখিনি দে।

কোনোবা এজনীৰ হালধীয়া ফ্ৰক আছিল কৰবাত লাগি

ৰঙা এটুকুৰ কাৰো ব্লাউজৰ পৰা আহিছিল ছিগি

নীলা এডোখৰ আছিল তাতে কাৰোবাৰ লুঙীৰ পৰা

যিয়ে যেনেকে' য'ৰ পৰা পাৰে ছিঙিলে কাণি-ডোৰা।

ফ্ৰকটো ব্লাউজটো লুঙ্গীখন কত বিচাৰি পায়

লাভৰ মুৰত হাতে হাতে ফটা কাণিৰ হে ঠাই

কি আলখাল্লা আছিলি কি আলখাল্লা হ'লি

হৈ হুল্লুৰ হাল্লা গোল্লা আৰু হুলাবুলা হ'লি।