এনাস্থেচিয়াৰ স্তৱক অষ্টক

 

স্তৱক এক

তোমাক এবাৰ চুই চাবলৈ মন গৈছে

চকুত চকু থৈ (আছেনে সেই সাহস)

অপলক নয়নে তোমাকেই চাই থাকিম যেন

বিৰাট মন গৈছে

কথা পাতি থাকিম অনৰ্গল

 

স্তৱক দুই

স্তৱক দুইটো এনেয়ে

একো কথা নাই

কথাবোৰ শেষ হৈ গৈছে

 

স্তৱক চাৰি

স্তৱক চাৰিটোও এনেয়ে

সকলোবোৰ কোৱা হৈ গৈছে

কথাবোৰৰ একো কথা নাই

 

স্তৱক তিনি

এই যে ছিন্ন-বিছিন্ন দেহাংশ ছিটিকি পৰিল

অগণিত মানুহৰ আত্ৰাণিৰ সংবাদ পালোঁ দুদিন আগতে

এক ভয়ংকৰ অমানৱীয় নৃশংসতাৰ প্ৰতিক্ৰিয়া

ক’ত?

ক’ত?

 

নিজে নিজকে চিকুটি আছোঁ

 

স্তৱক ছয়

দুদৰা ধাননিৰ মাজেৰে এক দিকচৌ বাটেৰে

চাইকেল চলাই গৈ থাকিবলৈ মন গৈছে

অটব্য বাঁহনিৰ মাজৰ জঁয়াৰ আন্ধাৰত

বাট হেৰুৱাবলৈ মন গৈছে

 

স্তৱক সাত

আৰু এটা স্তৱক এনেয়ে

কোনটো স্তৱক আগৰ কোনটো বা পাছৰ

স্তৱকে স্তৱকে ভাবুক লাখৰ

 

কেৱল প্ৰশ্নবোৰ কৰাতেই জানো কথাবোৰৰ শেষ

গানৰ মাজতে ৰৈ যায় পীট চিগাৰ

 

স্তৱক পাঁচ

নিজে নিজকে চিকুটি আছোঁ

আলপিন এটা লৈ হাতৰ তলুৱাত খুঁচি চাইছোঁ

জ্বলি থকা মমডালৰ শিখাত হাতখন পাতি দিছোঁ

নিজৰে জিভাখন এবাৰ

নিজৰে দাঁতেৰে কামোৰ মাৰি দি চাইছোঁ

 

কিবা অনুভৱ হয় নে নহয়

এতিয়াও কিবা অনুভৱ হয় নে নহয়

 

স্তৱক আঠ

তোমাক নাপালে মই মৰি যাম বুলি ক’বলৈ মন গৈছে

তোমাক পাই মোৰ মৰি থাকিবলৈ মন গৈছে

মৰাৰো মৰিবলৈ মন যাবই পাৰে

 

 

সমুদ্ৰ কাজল শইকীয়া

kankhowa@gmail.com, +919811375594