সুজাতা

বিৰিখৰ

আঁৰে আঁৰে

ৰঙা মাটিৰ

কাঁকড় গছকি

আগবাঢ়ে

সুজাতা

শীৰত পৰমান্নৰ মলা

যেনিয়ে পৰে খোজ তাইৰ

বোধিদ্ৰুমৰ বাট

সেই যি প্ৰথম

বাজলৈ ওলাল

শিল্প

মুকলি আকাশৰ তললৈ

ওলাল শিল্প

মানুহৰ সান্নিধ্য বিচাৰি

মুক্তিৰ সন্ধানত শিল্প

আৰু 'দেখি নাই ফিৰে'

শীৰত লৈ পৰমান্নৰ মলা

ৰৈ থাকিও গৈ থাকি

গৈ থাকিও ৰৈ থাকি

কি কৈ থাকিল

সুজাতাই

সত্যান্বেষনৰ

আলোকপ্ৰপাতৰ প্ৰত্যাসী

পৰমান্ন

শীৰত তুলি

স্থিতি গতিৰ দ্যোতনাত সুজাতা

ধাৱমান সুজাতা স্থিতপ্ৰাজ্ঞ সুজাতা