বৰ্ষান্তিক

 বছৰ এটাত যিমান যি নঘটক কিয়

বছৰৰ শেষত বছৰটো এনেয়ে অথলে যোৱা…

অবাবৰ কোমোৰা এটা যেনেই লাগে

ঘটিবলগীয়াকৈ তেনেকৈ একোৱেই নঘটে দেখোন

 

সকলোবোৰ মনত ৰখা হ’ব বুলি বুলিছিলোঁ কি

আমিও চাই ল’ম বুলি বুলিছিলোঁ কি

কি বাটে বাট বুলিম বুলি বুলিছিলোঁ কি

মণিকালৈ ফোন কৰোঁ বুলি

ফোনটো আনিবলৈ আনটো কোঠালৈ গৈ

উভতি আহোঁ

অলপ আগেয়ে সেইটো কোঠালৈ কিয় গৈছিলোঁ? 

 

কাৰোবাৰ ঘোঁৰাৰ ঘাঁহ কাটোঁতেই বছৰটো যায়

ঘঁৰিয়ালৰ খাল খান্দোতেও যায় কাৰোবাৰ

তথাপি বছৰটোৱে শূন্যহাতে নিজকে সামৰে 

 

কিজানিবা যিটো বছৰত পৃথিৱীখনেই ছাৰখাৰ হৈ যাব

সেইটো বছৰৰ শেষতো এনেকুৱাই লাগিব

মুহূৰ্তে মুহূৰ্তে কিমান গ্ৰহ নক্ষত্ৰই অস্তিত্বৰ কাহিনী সামৰিছে

তাৰ মাজত ই এখন পৃথিৱীৰ অৱলুপ্তিনো

কিটো ডাঙৰ কথা?

 

এৰা, বছৰটো যেতিয়া শেষ হ’বলৈ লয়

ডাঙৰ কথা বুলিবলৈ একো নাথাকেগৈ

  

(অৱশ্যে দুটামান ডাঙৰ কথা থাকে সেইবোৰ

কুইজত আহিব বুলি ছাত্ৰছাত্ৰীসকলে একোবাৰ জুকিয়াই লয়)।