পা

১) 

(এজাক ল'ছালিৰ মুখৰ 

ল'ৰাধেমালিৰ সুৰেৰে মুখৰ
আছিল সন্ধিয়াটো পদুলিমুখৰ)

ইমান ইমান পানী
গেৰোৱালৈকে পানী
ইমান ইমান পানী
আঁ‌ঠুলৈকে পানী
ইমান ইমান পানী
কঁ‌কাললৈকে পানী
ইমান ইমান পানী
বুকুলৈকে পানী
ইমান ইমান পানী
ডিঙিলৈকে পানী
ইমান ইমান পানী
ইমান ইমান পা...
(ৰচনাকাল- ১৯৯৪)

২)
পা মানে পাছবুক, পা মানে
পা-পৰিয়ালৰ সম্পত্তিৰ খক।
মৰিবলৈ ওলোৱা প্ৰেম বুঢ়াৰ
পানীৰ পিয়াহ
পা মানে কোনেও বুজা নাছিল
বুজা নাছিল প্ৰেমৰ অন্তিম ছবিখন

৩)
আৰু তাৰপিছতে হেলিকপ্টাৰ আহিব
আকাশত হেলিকপ্টাৰ ঘূৰিব
মথাউৰিত ছাগলীৰ পঘা টানি টানি সি
ঘূৰি থকা হেলিকপ্টাৰ চাব
হেলিকপ্টাৰ ঘূৰি থাকিব
সি ঘূৰি থাকিব আকাশত হেলিকপ্টাৰ পাক খাব
হেলিকপ্টাৰ চাই চাই সি পাক খাব
মঞ্চৰ পোহৰ কমি আহিব
হেলিকপ্টাৰ চাই থকা তাৰ চকু পাক খাব
তাক চাই থকা দৰ্শকৰ চকু পাক খাব
(দৰ্শকে এদিন চকু পকাই ধৰিব এয়া আশাহে মাথোন)
ছাগলীৰ পঘা পাক খাব
হেলিকপ্টাৰ পাক খাব সি পাক খাব পঘা পাক খাব
পা মানে পাক খোৱা
পা মানে পা

(দীপক গগৈ আৰু পংকজ জ্যোতি ভূঞাৰ প্ৰতি)