এনেকৈয়ে মই তোমাক হেৰুৱাওঁ

মোৰ নিশকতীয়া হাত দুখনে

কল এটাৰ বাকলিও ভালকৈ গুছাব নোৱাৰে

দুর্বল এই হাত দুখন

তোমাৰ হাতখনো ধৰি ৰাখিব নোৱাৰে

পিছলি যাব খোজে

বাৰে বাৰে পিছলি যাব খোজে

মুঠি এটাও মাৰিব নাজানে এই হাতে

নিজৰ বুকুতে ভুকুৱাই কান্দিবলৈকো

ভুকুটো বুকুত নপৰেহি

বৰ অসাৱধান বেহিচাপী এই হাত দুখন

তোমালোকৰ হাজাৰ হাজাৰ হাতৰ মুঠিৰ

শূণ্যস্থান মোৰ হাত দুখনে

কেতিয়াও পূৰণ কৰিব পৰা নাই

বিকলাঙ্গৰ সংৰক্ষিত ৰেলৰ দবাতো

তুলি দিব নোৱাৰোঁ মোৰ হাত দুখন

যলৈকে যাওঁ লগতে লৈ ফুৰোঁ

জেপত সুমুৱাই থওঁ

আৰু

আৰু

আৰু লাজতে জেপত সুমুৱাই থওঁ বুলিয়েই

মোৰ হাত দুখনে তোমাক ধৰি ৰাখিব নোৱাৰিলে। 

[হুঁ, HOON (collection of Verses in Assamese), Published by Bornali Borgohain on behalf of Aakhar Prakash, Guwahati 3, Guwahati Bookfair Jan 2009]